الهالات السوداء اسبابها وكيفية العلاج منها بالطرق الاكيدة

الهالات السوده هى عبارة عن ان المنطقة اللى تحت العين لونها بيبقى غامق وبتسمر وبتختلف من درجة لدرجة على حسب شدتها بس الاول لازم نعرف اسبابها؟

1-السهر :

العدو اللدود بتاعنا كلنا واللى برضه بنحرص عليه فتقريبا كلنا ببنام بعد الساعة واحدة بالليل وده طبعا بيعمل ارهاق جامد للبشرة وكمان هالات سودا

2- سوء التغذية :

للاسف كلنا دلوقتى وحتى انا زيكم بنهمل احدى الوجبات يعنى مثلا غدانا بالليل او فطارنا العصر وده بيرجع برضه للسبب الاولانى وهو السهر ان بقى ليلنا نهار ونهارنا ليل فطبعا جسمنا كله بيختل وكمان مواعيد تناول وجباتنا بتبوظ على الاخر وبيكون صعب علينا ننظمها تانى
 

 كمان الفاست فود والهامبورجر والمقليات والكاتشب والمايونيز وكله اكل دهنى وعالى فى السعرات وكمان اكياس الشيبسى وعلب الكانز اللى بقت الشعار الرسمى لطلاب الكليات وكمان الموظفين

وكمان البعد عن السلطة الخضرا والعصير الطبيعى والخضار السوتيه

3- الارهاق :

ناس كثيرة جدا يا جماعة مننا بتشتغل وتدرس فى نفس الوقت او بتعمل دراسات عليا وتمأأ عينيها فى الكتب والموسوعات العلمية

وناس تانية بتشتغل وتربى الاولاد وترجع البيت طيران تلحق تطلع اى حاجة من الفريزر تفك تلجها قبل سى السيد ما يشرف

واللى بتذاكر للعيل الكبير وتغير البامبرز للعيل الصغير وكل شوية تبص على الغسالة تشوفها فصلت ولا لا عشان تلقح تنشر قبل الشمس ما تروح

وكل دووووووووول هم كل السيدات المصريات للاسف تبقى داخلة بكل روحها فى الطاحونة ومش بتدى لنفسها يوم اجازة وعاملة تدور فى الساقية طول الاسبوع بلا رحمة





4 - التوتر :

اظن كلنا بنمر بفترات صعبة زى ولادة - مرض - امتحانات - مقابلة شخصية - خناقات مع الزوج - مشاكل الحماة والسلايف - الرئيس اللى بينكد علينا فى العمل - الزملاء اللى بيعملوا اسافين من تحت الترابيزة - المصاريف الكثيرة كل شهر لدرجة اخر الشهر نقضيها بدنجان وفول او نفكر نستلف - نمر العيال الموكوسة فى المدرسة - جارتى اللى بتجر شكلى

وعدى من النوع ده كثييييييييييييير والنتيجة ان دمنا يتحرق ونغلى ونهرى وننكت فى روحنا ونلاقى ناس بتصدع وناس بتتعب وناس ضغطها بيرتفع وناس بتجيلها ازمات قلبية ربنا يعفى عنا جميعا ومن الضمن ان بشرتك بتبقى شاحبة وهالات سوداء كثير تظهرلك حول العين

5 - الانيميا :

دى بقى 80 % مننا عندهم انيميا وبترجع بشكل كبير لسوء التغذية وان اكلنا مفيش فيه الحديد الكفاية لتكوين كرات دم حمراء كويسة وكمان اغلب الستات عندهم انيميا بسبب الحمل والولادة ودم النفاس ودم الدورة الشهرية ومن اهم اعراض النحافة شحوب البشرة والهالات السوداء

6- الوراثة :

بعض الناس بيكون عندهم موضوع الهالات ده وراثة يعنى تلاقى امها - اختها - اخوها - جدتها - خالتها - عمتها عندهم هالات سوداء وملهاش اى اسباب صحية بس اهو سبحان الله مسالة وراثية وبيكون صعب علاجها فى النوع ده

7- العين الغائرة :

بعض الناس بتتولد اصلا عيونها غائرة يعنى داخلة كده لجوة وبالتالى تدى انطباع قوى ان الجفون من تحت سودة وغامقة بسبب انغماس العين للداخل فبترمى ظل غامق يعمل هالات سوداء

8- فرك العين :

ودى عادة مش كويسة تلاقى البنت صاحية من نومها ونازلة دعك فى عينيها كانها بتدعك سيراميك الحمام او مثلا واحدة جوزها مزعلها وتروح جايبة منديل محلاوى وتقعد تعصر فى عيونها وتفرك فى الجفن وتبهدل نفسها

كل الحركات العنيفة دى تقطع الشرايين الدقيقة والشعيرات الدموية الرفيعة اسفل العين وينزف منها دم يتحوش تحت العين ويدى غمقان وهالات سوداء

9 - التهابات الجفون :

ساعات كثير تحصل عدوى ميكروبية على الجفن وتلاقى الجفن بقى احمر وساعات لزج وعليه قشور بيضا مغطياه وتحسى بحرقان على حواف الجفن عند الرموش وكل ده التهاب محتاج مرهم مضاد حيوى
بس مع الاهمال فى العلاج الالتهاب بيروح وبيعمل غمقان بعده ودى حالة طبية اسمها فرط التصبغ الالتهابى يعنى الجلد صبغته بتزيد بعد الالتهابات

دى كانت الاسباب بإختصار طب دلوقتى اية الحل عشان نتخلص من الهالات دى

1- النوم يوميا فترة لا تقل عن 7 - 8 ساعات حتى العلاج منها والنوم الطبيعى لا يقل عن 7 ساعات

وندخل السرير الساعة 11 مساءا على الاكثر والمفروض قبل كده كمان على الاقل 4 مرات اسبوعيا 

2- الفواكه ثم الفواكه ثم الفواكه لتنها مهمه جدا وغنيه بالفيتامينات بعد الاكل بساعة لازم ناكل فاكهة واى نوع على بالنا مفيد ويا ريت نركز على الاكلات الغنية بفيتامين سى لانها بتفتح البشرة وتنقيها زى :

البرتقال - الليمون - اليوسفى - الجريب فروت- الطماطم - الاناناس - الكيوى - الفراولة - الرمان - الجوافة - الكنتالوب

3- يا ريت ننظم مواعيد تناول وجبات الطعام بتاعتنا

يعنى الفطار من الساعة 8 الى 10 صباحا
الغدا من الساعة 3 عصرا الى 5 مساءا
العشاء من 9 الى 11 مساءا

4- طبق السلاطة

اساسى معانا فى كل وجبة غداء ولازم يكون فيه يوميا خيار - خس - جرجير ولو ينفع نزود بطماطم - بصل - ثوم - جزر - بنجر - كرنب هيكون رائع مع اى دريسينج او تتبيلة تجى على ذوقنا

5- نمنع نفسنا خالص من الفاست فوود والاكل برة البيت واكياس البطاطس والكانز

6- نقلل خالص من استهلاك الشاى والقهوة والنسكافيه والكابتشينو والمياه الغازية

7- ممنوع فرك او دعك العين خالص

8- فيه بعض الكريمات اللى فى الصيدليات بتمن رخيص بس طبعا كل الخطوات اللى قبل كده اهم من ده وانا هقول على اسم كام كريم مفيد وتم تجربته لو الهالات خفيفة هنستعمل كريم شيد اوت اى كونتور
shade out eye contour cream
وده يا جماعة ب 17 جنيه 

لو الهالات متوسطة يبقى ندهن كريم بيرلايت
pearlight cream
وده يا جماعة ب 27 جنيه

لو الهالات شديدة بندهن كريم ريتينوكس كوريكشن بتاع شركة روك
retinox correxion

يشرفنا تواجدكم الجميل معنا على الفيس بوك

لمتابعة المواضيع النادرة والمتميزة والغريبة على الفيس بوك اضغط هنا

Posted in: بنات